واحشاني

واحشاني
قوي
واحشني نسيمك اللي بيهفهف
من فتحة شباك
أي شقة/بيت/قصر/عشة
بيلمس خدود السهرانين
في ليلة صيف
واحشني التلج
اللي بيوارب بيبان الدفا
وينخر عضم الغلابة
المزروعين
في أرضك عيدان
حطب
جذوعها سنديان
فروعها عناقيد ريحان
واحشني العرق اللي
بينقط من جبينهم
والتراب اللي بيعفر
شوارعك
و الدخان اللي بيعطر
بيوتك المفتوح بيبانها
لكل عابر سبيل
واحشاني نتف القطن الأبيض
لما بتزوّق سماكي
في عصرية شتا
وساعة المغارب
لما يغسلك
مطرها الدفا
واحشني زحامك
ليلك ، نهارك
واحشني فيكي السكون
اللي بينطق ألف كلمة
بألف معنى
بألف لحن
بكل لون
واحشاني دمعة شوارعك
ساعة العصاري
ولا الضي اللي في عيونك
من فوق الكباري
واحشني التاريخ
اللي متمرمغ
في كل ركن
في بدن أخضر
لا عمره شاخ
ولا بانت عليه السنين
واحشني الجد فيكي
واحشني البكا
على كتف
الحبايب
والمعشوقين
واحشاني
الدموع اللي في عيون
القرايب
ساعة الفراق
واللقا
وساعة الحنين
واحشاني
وحاشتك
عظمتك
عيوبك
طهارتك
كنايسك
جوامعك
مدارسك
مصانعك
غيطانك
حاراتك
قصورك
عمايرك
نخيلك
شبابك
نجمك
حليمك
دنقل شهيدك
صوت الست
ف قهاوى السهر
شتيمة الأحبة
في نغمة معاتبة
وضحكة شقية
لكلمة مواربة
واحشاني ايد
ساندة الدماغ
اللي دايب
في فنجان عذاب
شقاوتك
واحشاني
يا خالقة
يا خانفة
يا واجدة
يا قاتلة
واحشاني
يا
مصر